Э школа

Э школа.

Сал-бесал эдембу параменд бире зиндегуни колхозчигьой Дербенд. Богъгьо дорембируьт буле бегьергьо. Косиби руз-беруз эдембу вир бире эз гIэрей хэлгъ. Зиёд биреи гелуьргьой колхоз дорембу минкини, неки эри гуьлишонлуь сохде зиндегуни колхозчигьоре, гьемчуьн эри параменд сохде культура ве данани энугьореш. Омбаре активистгьо, жовонгьоре фурсорембируьт эри хунде э рабфакгьо, институтгьо ве техникумгьо. Э колхозгьо гуьнжо овурде оморебируьт ликбезгьо ве экуьнди гьемме колхозчигьо эдембируьт хуте бире десхэтире. небу колхозчигьо, гIэилгьой комигьоки нисе хундебируьт э школагьо.

Изму гIэилгьо гьеле те э школа рафде сер гирденуьт эри хуте бире десхэтире э богъчегьой гIэили ве эз бебегьо-дедегьошу, чуьнки изму нисди кифлетгьо, э комики недебу хундеире данусдегоре одоми. Оммо гIэилгьой увэхди не богъчегьой гIэилиреш недирет, не эз бебегьо-дедегьош хуте небирет десхэтире, чуьнки угьо ишуш десхэтире нисе данудебируьт. Кими десхэти данусдебируьтгьо бебегьо бируьтгеш, гене угьо э кор гIэилгьоре э кифлет десхэти дореи фикир нисе доребируьт. Эзуш бэгъэй угьо гьич ниденишируьт э дефдергьо-книггьой гIэилгьо, нивинируьт ве ниданусдуьт угьо чуьтам хунденуьтге. ГIэилгьо ишу эз эгъул хуьшде эз фегьмгери ве эз кумеки тербиедорегоргьой школагьоревоз эдембируьт хунде ве вегирде тербией девр советире.

Ёвдо, неки хундебу э нубохунде экин раби, у гьемчуьн те э суьфдеи довгIой гIуьломи рафде, хундебу е-дуь сал э реальни училищеш. Эзуш бэгъэй у биребу э лешгер падшогьети ве э есири э Германия. Унегуьре хунде-нуьвуьсдеи зугьун урусире данусдебу. Гене уш э нубохундей гIэилгьо кумеки нисе сохдебу. У энжэгъ эз учитель, э класс комики хундебу келеи кук ю Шолум, гIэре-гIэре мипуьрси:

—ГIэил чуьтам хунде?

—Зобу нисе хунде, —жугьоб мидо учитель.

Шевеньё гьеле шеш сале небиребугеш, уре эз хундеи ве нуьвуьсдеи хьэз оморебу. Шолум нубогьоре э сохдеки, у миомо мипоисд э ён бирор ю, кем-биш семе хуте бу гуфдире, оммо Шолум мигуфди эзу:

—Чуьни? Хьэк туьре вор ди эзинжо, мешет месох, бигьил нубогьой мере хунум...

Чорей Шевеньё нисе бирембу, гирисдени бире, у мивадарафд э у хунейге. Оммо метлеб хундеи-нуьвуьсдеире хуте биреире у нисе шендебу. У мивегирд гозите ве э келе хьэрфгьо денишире, угьоре шекуьл микеши э дефдер. Шохьонгум Ёвдо оморенге, Шевеньё мипуьрси эз бебешу мэгIэной эну хьэрфгьоре. Омбаре вэхдгьо Ёвдош уре пиш сохде, мигуфди:

—Бигьил мере нуьшуьм, мере дультуь нисди...

Оммо кими вэхдгьо у андуьрмиш мисохд э Шевеньё мэгIэной хьэрфгьоре. ГIэре-гIэре Шолумиш, кеф ю хуб бирембугьо мэхьэл, андуьрмиш мисохд э у мэгIэной хьэрфгьоре.

Э гьечиревоз Шевеньё екем хуте биребу десхэтире ве лап домунде-домунде кем-биш гофгьой гозитеш хунде данусдебу.

Шевеньё суьфделе э хьофди пой доноребу, кейки хьэлово бисдогьо э бебешу, юре э школа нуь гуфдире. Ёвдо, гьеле-меле э герде невегирде, мигуфди эзу: "Туь гьеле чуьклеи, хэлефме, туьре гьеле нивегируьт э школа".

Ёвдо, денишире виниренге, ки Шевеньё эдее сер-гуш юре берде, огол зере Шолуме, мугу:

—Ги митрик энире, ире бер себэхь э школа ни.

Себэхьимуьн Шолум гъул Шевеньёре гирде, берд э школа. Шори Шевеньёре гъэдер небу. Чорей эну мибисдоге, эз хуне э школа рафдеки, вежегьисде-вежегьисде мирафд. У э сара балай хуьшдеревоз хуьшдере вешенде-вешенде эдембу рафде рэхьэ.

Шолум Шевеньёре э кабинет директор школа дировунденге, гуфдиренге метлеб хуьшдере эйчуь овурдиге уре, директор дениши гьевел э Шолум, песде э балай Шевеньё, гьич э метрикиш неденишире, мугу:

—Дедешмуре, хэлефме, э гуфере дие гIэил дери?

Шолум неварасире метлеб гофгьой директоре, жугьоб до:

—Дери.

—Гьечуниге, бура у гIэиллереш биёр, песде гьердуьре эеки мивегирим, хэлефме.

Энжэгъ имогьой вараси Шолум мэгIэной пуьрсуьш директоре. У могъбул бире, гъул Шевеньёре гирде, ведиромо эз кабинет.

Эз школа э хуне э рафдеки, Шевеньё зар доно гирисд. Э гIэрсгьой Шевеньё денишире, чумгьой Шолумиш гIэрси бисдоруьт. Угьоре е биней коре неданусдегоре одоми мивиниге, гьечи миданусд угьоре гьерки-бисдош куфде гуфдире.

Пушой э богъчирегьо дарафде бу. Увэхди э богъгьо унгъэде кор нисе бире. Омбаре колхозчигьо корсуьз биренуьт. Ёвдо э гьейву нуьшдебу эдембу чой хурде, кейки Шолум не Шевеньё э чумгьой гьердуьшу гIэрсгьо вери, оморе э пушой гьейву поисдуьтгьо.

—Чуьни, ки куфди ишмуре?

—Екиш, —мугу Шолум ве ихдилот сохд эри бебешу чуь гуфдириге э ю директор школа.

Ёвдо, пейлей чой хуьшдере норе, гъул Шевеньёре гирде, рафд э школа. У э школа оморенге, директор э кабинет недебу. Угьо поисдуьт э гьейвуй школа э гузет, те директор оморе. Зингиле зенг зеренге, эз классгьо ведироморуьт суьфде гIэилгьо, песде учительгьош.

Эз е класс ведиромо е дуразе балае мерд, э дес ю дефдергьой ученикгьо дери. У, куьнд оморе, руз эхэйрбу доре Ёвдоре, пуьрси:

—Хэйр гердо туь инжо поисдей?

И мерд бу куьгьне дусд Ёвдо, еки эз суьфдеи учительгьой Дербенд Юханан Пинхасович Пинхасов. Ёвдо ихдилот сохде бэгъдо гъозие-гъэдере, мугу:

—ГIэил зиреке гIэили, кем-биш хунде-нуьвуьсдеш данусдени, эз гозитгьо хуте бири, сер-гуш мере берди, э школа ни эдей гуфдире.

—Гьери кешит э меревоз, —мугу Юханан Пинхасович.

У деберд угьоре э класс, нуьшунд Шевеньёре э парт ве гьишд нуьвуьсде гьерчуь-бисдош.

—Гьери нуьвуьс, чуь данусдеге туь нуьвуьсде.

Шевеньё, гIэйбе-гIэйб, десгьо лерзире-лерзире э дирдириревоз эз келе хьэрфгьой гозити нуьвуьсд: "ВАТАН СОВЕТИ".

—Молодец! —мугу Юханан Пинхасович. —Туь бура Ёвдо э кор туь, эри гIэил книг-дефдер, гъэлем-ручкеюре восдо, себэхь э гьемме герекиревоз фурс э школа. Э директоревоз ме гоф мисохум, туь олхоин бош. Имбуруз мунугу экинме, э класс ме михуну...