Дуьимуьн серне

Шев хэйли гирошдебугеш, гьеле унгъэде торик небиребу. Оммо эри э шегьер гешдуьгьо одоми гьечи оморембу, гуйге э инжо екиш не зигьисде гуфдире: э кучегьо е доне одоми, е доне зинде нешумо веди небу, гьич е сеслеш не оморембу, мигуиге гиснее сеггьош, гьолок бире, э ширине хов дебируьт. Хэлгъ, дергьо-пенжерегьоре э гъилигьоревоз сэхд сохдебируьт. Эзуш бэгъэй угьо э дергьо-пенжерегьо гьечу пердегьо кеширебируьтки, гьич е тираклеш веди небу. Оммо екиш нэхисиребу, хэлгъ эз терс э гузгъулогъ бу: ки дануьсде эз дегь-бисд дэгъдэгъэйге чуь мибуге?! Кими одомигьо эз терс эз лэгIэй хуьшде гьич е гофлеш не ведировундембируьт.

Шенде эз терс песово-песово денишире-денишире, эдембу рафде эз хэвлете кучегьой шегъер. Мигуиге кучегьош э гуьзгъулогъ поисдебируьт. Эз теретэгIди не зури-зури рафдеи, е-дуь бо пой эну демунде, офдореш офдорени, оммо гене, серсоне хуно, вэхуьшде, у зури-зури рафдембу, терсе-терс, гуйге киниге эдее э песой ю оморе. Оммо кире герек бу э эзини мзхьэл и косиб-гIолие одоми. Гьелбет екиреш, Шенде юш дануьсдембу михьтож ю екиш нисдигьоре, оммо эз терс дуьл хуьшде, эдембу, чопгъуне хуно, рэхьэ рафде. Шуш нефес гирде у омо раси э юре герек бугьо жиге. Дере куфд, ю пэхьни бисдо э сое, Ошир, дере вокурде, Шендере диренге, э мэхьтелиревоз пуьрси:

―Шендеи?! Имэхьэли? Хэйр гордо, чуьни? Чуь бири беге?—Эз гьул бирор гирде, деберд уре э дору.

Ошир бу е лэгъэре очугъэ 23 сале жовон, гьуьндуьре бала, кегьробое чумгьо, мигьрову, дуьлочугъ, темизедуьле одоми. Э хосиетгьой ю гуьре, могьлугъэ, жем-жогьиле хьэз оморембу эзу. Угьо гьеммише хьуьрмет энуре гирдембируьт.

"Бивэхде гъуногъ" суьфде жугьоб недо. Песде екем э хуьшде диромеренге, чор тие дивор хуней бироре дире, эз дендунедерд гIэзиет кеширенигьо одомире хуно, ловгьоре гъуьжунде, пуьрси;

―Ижире зигьисде туь?

―Чуьтам?—Ошир не варасире — Зобуни? Шенде гене иловлей хунере фегьм сохде, эрию хуней бирор чуьн е хэребее есиёв оморере хуно, пуьрсирени:

―Э гуфдирей туьревоз иш зиндегунини?

Ошире воисдембу шелей энуре венуь э рэхь декинуь, оммо екем тоб доре, тиж денишире э сифет эну, мугу:

―Гьелелуьге мере иш весси! Эри хисире мере гьем жиге, гьемиге хьэлов-болушме гьисди. Эри чи хурде, епоеш гьисдиге,—столиш гьисди. Туь гьич епое стол дирей?

―Е пое стол? МуьгIуъжуьзи! — Шенде вини, чуьтам Ошир бирор ю е лой тэхдере э дивор вогосунде, эзир эн елойге, тегьер десдек чубугъ зеребуге,

―И столе ме хуьшдениме гъуьч сохдем, Гье э сер эни туьре хьэз нисе оморенигьо стол ме книг хунденуьм ве гье э инжо фикир сохденуьм: себэхьине рузме чуь-жире мибуге. Дузи, полхолиш нисди мере, хьэлове э сер хори гилови дешенденуьм, Гьемише гьечи нимуну, евош-евош гьеммеш мибу, кошки жунсогъи ве боворини бу одомире э себэхьине азаде шоре руз. Кей мибу, кей миёв у руз?

―Екем тоб ди, Шенде, иму хуьшдениму мибошим сэхьиб Ватан иму.

―Туь?

―Эри, меш...

Сер Шенде эз гофгьой Ошир нисе вадарафдембу. Э гъэзмей ю мушиш эз гиснеи мимуьруь, оммо гоф сохдей юре биё виниш: «сэхьиб Ватан... "Эз гиснеи муьрде, эз келегеди пара-пара бугьо одомигьоре хунои»,

―Туь гуфдиренигьо одомире е тике нун не кор бисдоге, дие гьичиш герек нисди дие? Ме эдем дире туьре эз келегеде гофгьо бэгъэи гьичиш нисе воисде,— мугу Шенде, лове э суьпуьле хэнде веберде.

―Туь эдей суъпуьле хэнде сохде, эме хэндуьсде, бирор,—э тегьнимиревоз мугу Ошир.— Миёв вэхд гьеммеш мибу. ТэгIди сохде герек нисе бире. Туьре воисдени гьеебо, э овосуне биренигьоре хуно, бу? «Очул суьфреи» беге эритуь? Эриме оморенигьо киниге туьре эдее эз рэхь ведеберде, эдей сер туьре гъэриш сохде. У негуьре туь нисе дануьсде чуь сохиге, э тараф ки бошиге Чуь офдори э дуьл туь? Е кор небире, туь имэхьэли экиме ниомори?

―Гуюм? Туьре воисдени гуюм эритуь дузире?

―Гу, бирор, гьичиреш э дуьлтуь медегьил.

―Ме эдее диренуьм туь гьечиреш нисе варасире,— мугу Шенде, ох вокошире эз кон дуьл хуьшде,— туьре эз гьичиш хэбер нисди. Хэбери ми туьре эзу кор, ченд-гъэдер одоми хуьшде, зере омориге э Дербенд?

―Мере эз гьемме коргьо хэбери,—сере жумунде, жугьоб до Ошир.

―Эгенер туьре эзу коргьо хэбериге, гу гьери эриме, кини тэхсиркор ингъэдер одоми пуч биреи?

―Мугуюм гьелбет. Ме лап хуб дануъсденуьм киниге тэхсиркор могьлугъ пуч биреи. Тараф ишуре негирдет гуфдире, гIоширгьо гьишдет угьоре зере. Эз гьемме э хэлгъ гуж сохди «национальный комитет». Лелей Оврумиш хьэрмэхь энугьои, уш э национальный комитет дебири, десгьой энуш э хуневоз билесумоли...

―Сес туьре гир!—Шенде, жингире хуно, э сер Ошир хьэрой вегирде, сер гирдени эзи куьнж хуне э у куьнж хуне эри рафде-оморе сохде— Погь, бебейме вой! Зугьун туь чуьтам рафде ижире гофгьоре эри гуфдире?! Зурбои» эри гуфдире гофиш нисе офденуьм...

Ошир, жугьоб нисе доре уре. "Бигьил э дуьл ю деригьоре, гьеммере гую,— мугу у э дуьл хуьшде, бигьил тигьи соху гъэгьр дуьл хуьшдере. Зурбо гъэриш сохде омори сер эни. Дусде эз дуьшме нисе шинохде. Чуъ имидгьо дори бу ире, чуъжире «гъэлечегьо" вокурди бу эри эни? Иш эдей э гофгьой энугьо бовор сохде. Дениш чуьтам гъэгьрелуь бириге? Нубой юре бегьем хунди...»

―Туьре гIэйб нисе оморе э сер лелей Оврум ижире хьэшогьоре вешендени?—Мугу Шенде, екем хомуш биренге.— Бебе муьрденге, имуре экин хуьшде э кор вегирди, сертен имуре вокурди. Оммо туь имогьой, эжигей лелей Оврум сохде хубе коргьо эдее эри эну дуьшмени сохде?! Ме мэхьтел биренуьм мунде, дуьл туь чуьтам рафдеге э сер лелей Оврум нум одоми куьшдеире эри веноре? Косибгьош, гIоширгьош —гьеммеш жугьургьой екиним!..

Шенде э текебуриревоз дениширени э лой Ошир, «гьери винуьм имогьой чуь жугьоб мидиге туь», гуфдирере хуно.

―Чуьни, гоф нисди эри гуфдире?—Гоф несохде поисдеи Ошире диренге, Шенде гьечи дануьсдени у гоф нисе офде гуфдире эри жугьоб юре доре ве у хуьшдере, чуьн е гъушуре бесгъун доре одомире хуно гирде, зиёд сохдени, ―Меш дануьсденуьм инжо гоф гуфдиреш герек нисе бире, гофсуьзиш ведини расди, дузи э лой киниге, Лелей Овруме ве уре хуно гьисдуьтгьо дуьрусде, вегир-луье одомигьоре ки нисе шинохде...

Ошир дие тоб недо, у э рачей Шенде поисде, тиж денишире э у, мугу:

―Имогьой гушдор дузире гуюм эритуь. "Национальный комитете» гIошире жугьургьо, э ишуреэоз лелей Оврумиш, гуьнжундет. Угьо э комитет омбаре кумекигьо сохдет. Бегем туь угьоре нешиновусдей?..

―Бошгу, туь гуфдире бугу, гуьнжундет, кумеки сохдет... Дие и хэйли жугьургьоймуре ки куьшди, пуч сохди?

―Ме э туь чендбойгеш гуфдирем, жугьургьореш ве де одомигьойгереш гIоширгьо гьишдет куьшде, пуч сохде, хэлгъ шегьере эз тозе хьуькуьмет эри бирази сохде. Метлеб ишуре эри бегьем сохде угьо не пуле гъимиш сохдет, не эз хун терсирет. Гъэчэгъгьо, хунризгьоре пул дорет эз пэхьники э могьлугъ шегьер хьэлово сохде. Оммо диренге, ки воисдешу нисе бире гуфдире, гьерки э е куьнж вирихдет пэхьни бире, муше хуно.

―Лелей Оврум...— Шендере воисдембу чуьниге гую. Оммо Ошир, гоф энуре бурра, мугу:

―Лелей Оврумиш, теимэхьэли невирихдиге, бовор сох уш ёгъин мивирихуь. Уш мирав э песой эну «комитетчикгьойге", чуьнки уш э угьоревоз зеки э могьлугъ шегьер омбаре гуж сохди, гьич тэхсир ишу небире одомигьо пуч бирет эз дес энугьо...

―Ме у коргьоре недирем ве дануьсдеш нисе дануьсденуьм

―Гье уни кор зобу гьисдигьо дие. Туь у гъозиегьоре мидануьсдиге? Э гъэд эну куьшде оморе одомигьо е доне гIошир недебиреиреш мидануьсди...

«Гье бошгу, —мугу Шенде э хуьшде демунде, э дуьл хуьшде,—гуюм у коргьо бирещ бири, «национальный комитет" чуь тэхсиркори эри энугьо?"

―Эриме оморенигьо,—мугу у, хэйли фикир сохде бэгъдо,— лелей Оврум эриму гьич зобуни несохди, гьеммише хуби сохди.

―Хуби сохди?— Чумгьоре тиж сохде, пуьрси Ошир. — Э гуфдирей туьревоз у сохдигьо коргьо хубе коргьои дие..?

―Э ёртуь биёр хубигьой...

Эри, лелей Оврум лап деилове, рэхьмедуьле одомини,— Ошир ловгьоре э суьпуьле хэнде вебердени,— эгъуьлмендиш гьисди, «худо мебуро" Э кими мигIидгьо сер-тен имуреш вокурди. Эйчуь невокуну! Иму, хэре хуно, кемер хуьрд сохдейм э богъгьой ю, э сер пулгьо гене пул овурдейм эрию, гIошири юре диеш зиёд сохдейм... Туь гьечи дануьсдени, эз иму эри эну хэйр нибисдоге, иму эрию гъэзенж ниовурдимге, у эриму у коргьоре мисохд? Пой, пой, тэгIди месох,—диренге. Шендере воисдени гоф юре зенуь, мугу Ошир,—Ме гъеле гьемере негуфдирем эритуь чуьжире одоминиге гье у лелейму, пой гьеммере гуюм. Эри, у «комитетчикгьоре» пул омбар дори.., кифлет фэгъире Бирориш э у пулгьоревоз кьушде омори.

―Туь чуь гуфдире?! Туь жингир бирей?!—Мугу э хьуьршевоз Шенде.

―НэгI ме жингир нисдуьм ме эдем гьисдигьоре гуфдире, гье гьечу чуьтам бириге у коргьо. Оммо туьре эз расде гофгьой ме хьэз нисе оморе, чуь сохум, дургуни гуфдире нисе дануьсденуьм.— Ошир екем э хуьшде демунде, гене э ёр ю чуьниге оморе, зиёд сохдени. —Э 1916-муьн сал мере э доегIо берденге э куьндигьой Смоленск гъисдики, э окопгьо векендеки ме омбаре дузе гофгьоре шиновусдем э товуней революция эз солдатгьо, гIэил-гьой урус — хьэрмэхьгьойме. Ме гьеле увэхди варасирем чуьмиге революция, чуьжире нике азаде рузгьоре миёруге у э хуьшдеревоз. Ме эзу хотуриш биё согъбоши гуюм эз лелей Оврум, мере эжигей Илову кук ю, пул доре, э довгIо фуьрсори гуфдире. Ме келе четинигьо дирем, гIэзиетгьо кеширем, э окопгьо бее зерем, эз хиникигьой Урусиет гирошдем. Энжэгъ имогьой угьо фурмуш бирет, оммо ихдилотгьой хьэрмэхьгьойме э ёрмени, угьо гьемме э инжиге деруьт...— Ошир десе зерени э синей хуьшде. — Э дуьлме гирдем гьишде угьоре ве гьич вэгIдош фурмуш нисохум. Дие ме имогьой ежирейге бире нидануьм, лап бирормереш воисдге... Эри, серме имогьоиш нисе вадарафде, туь имэхьэли эричуь оморейге экинме? Ме гьечи дануьсдембируьм, ки имуре дие гоф немунди эри э еки гуфдире, гьеммере буррайм-бесдейм гуфдире, эй екориш иму дуь-екире неварасирейм, не варасиреш ниварасим. Э ёр туь мунди у шев, лелей Овруме вирихде воисдембугьо? Имуре сэхд гофе-гоф бисдо, туь хэйли нифри-офриш сохди, екемлей мундебу туь э серме эри муьшд вегирде..,

У шевине женг э ёр ю оморенге, Шенде ёново дениши э Ошир, песде десе жумунде, рафд Э лой дер, гьич песово неденишире, пуьрси:

―Лелей Оврум невирихдге?..

―Э у одомигьо, комигьоки эри хьуькуьмет зобуни несохдетгьо, иму саташ нисе биреним. Ини Милих, боженэгъ лелей Оврум, гIошириш гьисдиге, синдили-гъундили нисе зере, гьеебо варасири рэхь революцияре гирде, сэхд сохде нибу гуфдире, Гьемме тукугьо не богъгьоре ю э десдин дес хуьшдеревоз дори э хьуькуьмет. Оммо лелей Оврум э хьуьжет офдори, э гъэршуй тозе хьуькуьмет вэхуьшди, тэхьне! сохде недануьсдигьо мол-девлете пуч сохди. Илову, кук юре, ю хуьшдению э гIэжел фуьрсори, Имогьой мэгIлуьм бири, ки рафде оморембуге экин гъэчэгъгьо... Унегуьре хьуькуьмет Совети гьемме чуь уре гьисдиге, гьеммере мивегируь эзу. Эзуш бэгъэй эри сохде бедкоригьой хуьшде у бис жугьобдорлуь бу э пушой хьуькуьмет, э пушой хэлгь, уре мидешенуьт ве э дивуш микешуьт. Ужире бедигьоре э у гьич екиш нибэхшуь».

Шенде суьпуьле хэнде сохде, гуфдирени;

―Ме дануьсдембируьм, туь тозе хьуькуьмете омбар хосденигьоре, оммо мере имид бу туь тэхьно инжо нипои гуфдире, гуьш э меревоз э Ёрушолеим, э хори бебегьо миёй гуфдире...

Ошир бирази сере жумундени:

―Ме эдее диренуьм, туьре бегьем эз сер ведешендет, туьш хьозури эри вирихде...

―Туь чуй гуфдире,— мугу Шенде, лове э суьпуьле хэнде веберде.—Туьре гьишде эже рафденуьм ме?..

―Э ме руьхшенд сохде? Ме руьхшенди нисдуьм! ―э хьуьршевоз гуфдирени Ошир, гоф Шендере бурра. — Мере дузире дануьсде воисде. Иму эз е деде бирейм, е бебе келе сохди имуре. Расди, эеки ухшеш нисе зере-ним: туьре зэхьмет некешире зигьисде воисде, гIошир бире воисде эри кефхьэз сохде, мере... ме сжирейге варасиренуьм мэгIэной зиндегунире, оммо иму кес нисдим, бироргьой екиним...

―Дузи, мере хубе шоре руз, мозоллуье зиндегуни воисде.

―Мозол не шоре руз эз хуьшде нисе оморе, у воруш нисди эри эз гьово тигьи бире Э эрэгъ жендек ве гъувот гъул хуьшдеревоз биё биёру инсон эри хуьшде шоре мозеллуье зиндегунире. Оммо эзи се-чар мегь пушо лелей Оврум туьре екем пул дори гуфдире, эритуь е дес партал сохди гуфдире, туь гьеммере фурмуш сохдей ве эри гIошир бире эдее имид бесде, туьре эз хьозури хьэз омори. Эзу хотур э недире, нешинохэ жигегьо, э чуь-жоиге «хори бебегьо» гуфдиренигьо рафде воисде, соки туьре имиди унжо келе гIошир мибоши гуфдире. Э кешейтуь келе хоегьо декорет, мигуиге унжо эз гьовои, воруше хуно, оморени суьрх тигьи бире. Эричуь бовор сохде туь э дургунигьо, хьиллее гIэмелдание гофгьой эну Миофдонн э дес инсофсуьз, песде пешму мибоши...

―Лелей Оврум э Ёрушолеим бири! Эйчуь бовор ние сохум э гофгьой эну? Беге у кеси? Эз хуби бэгъэй, у эриму гьич е зобуне кор несохди, У эриму зобунире гьич нихою.

―Ме екиреш нигьилуьм, лап лелеймеш бисдоге, э зиндегуниме, э гъисмет гIуьмуьриме эри гъэриш бире, Ме э екиш неверуьм. Шоре, азаде рузгьоре иму э дес-дин дес имуревоз миёрим эри хуьшде. Расди, хэлгъ иму гьеле сироиш нисди, э тен ю бегьеме партал, э пой ю бегьеме пойвокуш невери... Оммо дануьсде бош, дерзей гIошире хуругьо гъуигъ мивэрэхшуь, Песде эжигей эн и мэхьслегьо, раче парталлегьо э тен туь вокурдигьо, угьо эз туь гъэрдире михою, пусд туьре мекенуь. Увэхди э сер миофдони, чуьш сохдиге дие туь эз гъэрди энугьо хилос бире нидани .

Шенде дие тоб доре нисе дануьсде, хьуьршлуь бире, хьэрой дешендени э сер Ошир:

―Туь эки оморей?! Бебе-дедейму е соките, саламете одомигьо бирет, эз соей хуьшдеш терсирет. Ебо дениш гьеймогьой э Дербенд чуьжире коргьо гирошдеге? Ченд-гъэдер одомигьо э де вилеетгьойге рафдетге туьре хэбери? Омбаргьош э Ёрушолеим рафдет. Лелей Овруме воисдембу эритуь хуби соху, оммо туь...

―Эгенер лелей Оврум ингъэде дуьлсухуни сохдениге эриму, имуре мозоллуь сохде воисдембуге уре, дие теимэхьэли эже бу у, эйчуь богъгьо не ветэгъэгьо э дес ю дебугьо вэхд э иму кумеки несохдебу, дегь монет пул доре эри нечогъэ дедейму дерму невосдоребу. Имогьой э иму кумеки сохдегор бири. Уре воисдени имуш вирихим э юревоз. Э Ерошолеим чуь де уре? Эричуь гьечи видов-видов, ватан хуьшдере шенде, вирихде у?

Шендере воисдени ебойгеш варасуну э Ошир метлеб хуьшдере:

―ТэгIэл мебош, ме гуфдирере варас. Не эри лелей Оврум, не эри имуш дие э инжо берекет недомунди. Эзуш бэъгъэй гьеймогьоиш лелей Оврум, куьф хуьшдере жумундге, эзу офдонугьо е-дуь монетиш дегь чуьн имуни косиб-кусубе весси эри сирои бире.

―Гьери? Веди биремики «хосдегор" иму гьеле инжои, уьсделуьге куьфгьоюш пури!

Эз хьуьрш хуьшде Шенде мэгIэной гофгьой Ошире невараси. У эдембу зиёд сохде «нубой" Ошире хундеире.

―Туьре дануьсде воисдениге, уре э Ёрушолеим ченд е гъэлече хунегьой падшогьини, э бонк эн Лондониге, э чуьжоиге филонгъэдер пулиш дери. И пулгьо, и молгьоре лелей Оврум э хуьшдеревоз э гъовре ниберуьки. Гьеммей энугьо эриму мимуну. Ме эжигей туь мибисдорумге, мигуфдурум: «Кеш бирор офим лелеймуре, гьеммееки бигьилим бурайм эзинжо. Бигьил гIэилгьойму, невегьоймуш небиреи, косибире невинуьт, шор ве мозоллуь зигьуьт». Чуьни, эйчуь гоф нисе сохде?

―Ме имогьой е сэгIэти эдем гоф сохде...

―Герек нисдигьо гофгьоре?!. Э негьогъ нисдики туьре «большевика" гуфдиренуьтгьо?!

―Эри ме большевикуьм! Унегуьре ме, вечи-вечире хуно, э лугъэй нум кес неверуьм. Варасири? Пой мере норе эз жигеймеш нижуьмуьм. Ватанме инжои, инжо ме эз деде бирем, инжо келе бирем! Инжо гъовре сохде оморет ченд эрхэгьой бебегъо-келебегьойме! Хубигьо-бэхдеверигьош гье э инжиге миёв эриму!

―Гьери виним... Мун инжо, э гъэд гиснегьо нен пойбирэхьнегьо, оммо иму...

―Гьери...и? "Иму»? Лелей Оврум эдее диг-диги зере, ишму вежегьисде,— мугу Ошир эз гъэгьр екем сесе туьнд сохде. —Туьре гIэйб оморени? Э ёртуь биёр фэгъире бебе кешире сэгIэргьоре, Согъ гIуьмуьр хуьшде эри гIоширгьо кемере хуьрд сохди, бивэхд э жогъили, эзи гIуьлом е тешнеи вевегирде муьрд рафд. Гьеймогьой у мипуьрси эз иму: «Чуь бири ишмуре, гIэилгьойме, эйчуь э хьуьжет офдорейт, комини эз бебе мунде суьрхгьо, хэзинегьоре бэхс сохде кисе дануьсденит?— Ошир диеш тиж дениширени э сифет Шенде.— Увэхди ме жугьоб мидорум: «Бебе, кук туь, Шенде, гьеммере фурмуш сохди, эз ёр ю вадарафди, чуьтам кифлет бебей ю э гисней не тишнеи дерие рузгьо, екиш э ишу кумоки несохдигьоре, не гIошире леле, не девлетменде холу, не э сер хэзиней муьрдигьо шуьвер нуьшдигьо, гIэмей Басмат, екиш е абасимонет недоригьоре эри е лугьэ нун восдоре. Имогьой, гьеебо, эз некуми лелей Оврум эрию кумек ведиромори, куьнде дусд, юре омбархогье леле бири...

―Ме...ме...

―Имогьой гуш вени чуьжире жугьоб мидоге туьре бебе...

―Нум бебере овурде медеше э гIэре...

―НэгI, эз товуней бебе ёгъин э ёртуь овурде гереки,— диеш хьуьршлуь бире, гуфдирени Ошир.— Бебе эриму омбаре ихдилотгьо мисохд, э ёр туь мундиге. Имбурузиш у э туь лоигълуье гофе ёгъин мигуфди, Э ёртуь мундиге, гьеле бебе согъиндеш, хьиллее, дуьруй-дуькоре лелей Оврум, э комики гьеймогьой, мигуиге не дур дери не энгуьл, мигуфди: «Гьемме эз худоини — гIошириш, косибиш». Бебе мибисдоге угьоре гьеммере э ёр туь миёвурд. Туь екемлей фикир сох, варас, угьо бирору бирет: еки — гIошир — миллионер, екиге — косиб, гисне. Бебе кемер хуьрд сохди э онгурбогъгьой лелей Оврум, онгургьо не шоробгьо э гьомборгьой лелей Оврум дарафди, гьеле бирор бирекиш, муьзд фэхьлен юреш бегьем недори.

Эз гъэгьр кешире ве хьуьрш келе-келе гоф сохдеи ве недануьсдеи э рай овурде и гъонмезе бирор хуьшдере э Ошир вепичирени суьвре. Шенде дениширени э у, нисе дануьсде чуь сохуге, поюге небуге бигьилуь буравге.

―Имогьой бура,— гьич э лой Шенде неденишире, хэсдере хуно, гуфдирени Ошир —Бура, фикир сох эри-

туь, эгенер э сертуь екем семе мувэхь дериге, суьмер недериге, э эгъуьл миёй те дир бире, мивини э коми лоиге дузи-гьэгъи...

Шенде, э зарбевоз дере сэхд эере, вадарафдени.