Книг енебуге Туро

Книг енебуге Туро

Пушоте гуфдире оморигьоре хуно, Нисим не Ёвдо гъуншигьой еки бируьт. Угьо эз у руз э товун "Дуьм гъупии" женг гирде бэгъдо, эеки гофи небируьт.

Коргьой гуфдиренигьоре хуно: "Келе—келеи, гIэил—гIэили", келетегьо гъэгьри бу гуфдире эз еки, беге гIэилгьо варасирени биней эну коргьоре. Бирени ежирейгеш, гIэилгьо гъэгьри биренге эз еки, келетегьо э гуш нисе гирденуьт, не гирдеш герек нисе бире, чуьнки гъэгьри биреи гIэили " е дэгъдэгъэини", эзило гъэгьри мибошут, эзилойге, тейте екире дире, гоф сохде, э метелегьо чуь гуфдирегори: "хое мисохут". Оммо келетегьо гъэгьри бисдорутге эз еки, гъэгьрии энугьо омбар кешире, кими вэхдгьо те келе женггьо расиренуьт, тейте э гIэре е хубе дусд—боришмишсохдегор недарав.

Бебегьошу гъэгьри бируьтгеш эз еки, Содугъ не Шевеньё эз еки гъэгьри небируьт, гьеммише эеки возигьо мисохдуьт, э хунегьой екиш дарафде—дироморе мисохдуьт.

Нисим Содугъэ норебу эри хунде э нубохунде экин раби. Гьеле умэхьэлигьо кем-биш нубохундеигьо экин раби мундебируьт. Оммо Содугъ, виниренге хьэрмэхьгьою омбардекиш э школа хунде, хьэлово бисдо э бебешу, юре э школа нуь гуфдире. Содугъ—Содугъ бисдо, Нисим—Нисим, оммо Содугъэ генеш Нисим э школа не но. Содугъ э нубохунде рафдембугеш, дуль ю э хунде небу. У гьичиш нисе данусдембу. Рабире хундеи ве данусдеи Содугъ герек небу. Эге уре мивоисдге Содугъ хуб хуну, у мигуфди э Нисим э товун зобу хундеи Содугъ. Уре герек бу пул, комиреки гьемме мегь овурдембу Содугъ. Унегуьре Нисим нисе данусдембу зобу хундеи Содугъэ. Бебешу э хуне дебирембугьо мэхьэл Содугъ мивено э гъужогъ туроре, сере жумунде: "новорих" сохдере хуно, ловгьореш мижумунд, мигуиге эз расдекиш эдее нубогьоре хунде, оммо ю гьичиш нисе данусдембу. У гьемме руз эз нубохунде оморенге, мидарафд экин Шевеньё. Шевеньё э нубогьоре сохдеки, Содугъ минуьшд э ён эну ве хуте мибисдо хунде-нуьвуьсдеире. Э гьечиревоз эри эну хундеи эдембу руз-беруз лап ширин бире.

Содугъ, денишире виниренге, ки ю чуьш сохдге, бебешу юре э школа нисе норе чорею небисдо. минет сохде э Шевеньё, мугу:

—Гу э лелей Ёвдо э ме кумеки соху, нуь мере э школа.

И ихдилоте Шевеньё гуфдиребу эри Шолум. Шолум нуьшдебу э ён бебешу эдембу ихдилот Содугъэ сохде, Шевеньё, сумке э дес дери эз школе омогьо, э уревоз э хуне диромо Содугъиш. Эз герден Содугъ дуллу бу тогъор "тельмуьди", э гъэриш комики дебу е келе туро. Э пойгьой эну вебу куьгьне, жундуре пойвокугьо, э тен э пелуь-пелуье парталгьо. Сер-сенбол Содугъэ диренге, Ёвдо мугу:

—И чуьни, и кук Нисими э и жундуре парталгьоревоз?!

Гьеебо, гоф энуре бурра, Сенем зен ю мугу:

—Угьо гьеймогьой косибуьт.

—Пулгьой энигьоре чуь бири, эз бебешу мундигьоре?

—Туь нисе данусде беге, э сер чи—чи неомоге, темиз мибугьоре...

Гуфдиренуьт зенгьо женгесуре одомигьоют. Эз е тараф у гоф дузи, эз е тарафиге, вегирде виниримге, е мердиш не е хэгьер-бирориш э гъэвл дуь-еки нисе биренуьт унгъэде, чендгъэде э гъунши еки зигьисденуьтгьо зенгьо биренуьтге. Э негьогъ нисе гуфдиреки э метелегьо: "Эз дуре хэгьер-бирор, куьнде гъунши зиёди" гуфдире. Хэгьер-бирор гьер мерд э хуней хуьшдеи. Мердгьош согъ руз э кор ишуни, себэхь рафденуьт, шохьонгум оморе. Оммо гьеле увэхдигьо шуьверлуье зенгьо э кор нисе рафдембируьт. Мирафдуьтгеш энжэгъ э вэхд богъчирегьо, чуьнки герек бирембу бегьере эри зу вечире, зенгьош варасирембируьт чендгъэде бегьер зу вечире миомо, унгъэде э хунешу гелуьр мидировгьоре. Гьечиниге шуьверлуье зенгьо э кор мирафдге, эри мердгьо у келе номуссуьзе кор хьисоб бирембу. Э колхозгьо ве корхонегьо увэхдигьо энжэгъ жофо микешируьт элмунее зенгьо. Энжэгъ тек-тук бирембируьт зенгьо кор сохдембируьтгьо. Угьош ужирегьо бируьт, хундегоргьо енебуге дуз варасирегоргьо метлеб дегишуьгигьой девр Советире. Унегуьре согъ руз зенгьо бирембируьт эеки. Угьо эри гIов овурдеш, э базар-гуьзориш эеки мирафдуьт, ихдилот сохде-сохде, дуь эри еки фикир-хэел екире гуфдире-гуфдире. Бирембируьт ужире гъуншие зенгьо, эз еки гIовиш зиёди нихурдуьт, хурекеш эеки михурдуьт. Э минжи хьэёт мидешендуьт полхоле, э сер эну суьфрере, э иловлей суьфре нимдергьоре ве гIэилгьореш нуьшунде, михурдуьт нун пишнеинере.

Ёвдо не Нисим эз еки гъэгьри бируьтгеш, зенгьой энугьо Сенем не Мирвори э еки женги не бируьт. оммо эз песигьо угьо лап дусд бисдоруьт эеки, дерд-фикир екиреш эри дуь-еки ихдилот сохдембируьт.

Нисим нисе данусдебу эхи сохде дерд богъгьо-хунегьошу эз дес ю вадарафдеире ве у эри хуьшде хуьрди хьисоб сохдембу эри Хьуькуьмет Совети э е жерге э фэхьлегьо, "косибгьоревоз" жофо кеширеире. Екиге у жофо кешире хуте небиребу, не хундеиюш небу уре, бурав кор десхэти соху. Суьфдеи салгьо Хьуькуьмет Совети оморебугьо у хурде гешдембу ве имид бу уре, ки гьоргой бисдош тозе хьуькуьмет венгесде миёв ве богъгьо-хунегьо гене э ю мирасуь. Песдегьо пулгьо ве суьрхгьой бебешу варасденге, у вараси, ки нисди гуфдире ужире гъувот, комики дануь чарунде девр советире. У домунд э фикир чуь соху—чуь несоху. Варасирембугеш, уре фэхьле бире нисе восдембу. Оммо кифлет эдембу эз дес рафде.

—Пери Мирвори е гъоб гIорд эри гъэрд сохде дироморебу,—мугу Сенем, ихдилот хуьшдере варасденге.

—Дори?

—Эри, нидуь?!

—Лап хуб сохдей, э Нисим гуьре сохде герек нисди, эри эну гIэилгьо тэхсиркор нисди. Чуьтам сохим? Кумеки сохде гереки небуге гIэилгьо эз дес миравт. Оммо э уревоз гоф сохде четини, мивэхизуь женг мигируь.

—Женг гирдге, миведирой миёй.

—Гьери винуьм э сернуьш колхоз имуревоз меслэхьэт мисохум...

Себэхьимуьн эз кор оморенге, Ёвдо э хуне недарафде, дарафд э лой Нисимигьо.

—ГIэмел миёв дироморе,—мугу у эз Мирвори.

—Эри, эйчуь гIэмел нисе оморе, диро, гIэилгьойтуь муно, Нисимиш э хуне дери.

Гоф энугьоре шиновусденге, Нисим э гьейву ведироморе, мэхьтел бирере хуно, мугу:

—Ёвдо, чуьни, беге эз ме гене зобуне гоф-чи шиновусдей?

—НэгI, нэгI, ме эри эну коргьо недироморем, мере э туьревоз гофигеи, гIэмел миёвге...

Э хуне дарафде нуьшде бэгъдо, Ёвдо ихдилот сохде эри Нисим метлеб ю диромореире, мугу:

—Ме э сернуьш колхозевоз гоф сохдем, биёругу эрзо дуьгу, мугу, мивиним, гоф мисохим э членгьой правлениеревоз, песде миним пуьрсуьше э жэгIмие гуьрдлемей колхозчигьо.

Эз э хуьшде домундеи Нисим, Ёвдо варасики, уре хьэз нисе оморе э колхоз дарафдеи.

—Туьре э хуьшде езугъ нисе омореге, э гIэилгьо семе езугъ биёвгу, угьо келе биренге э беде рэхь офдореире эз екиш нижуру, туьре тэхсиркор хьисоб мисохут...

Э жэгIмие гуьрдлемей колхозчигьо хьуьжетгьо омбар бисдоруьт. Екиш е хубе гоф негуфди, эз зобунигьоре бэгъэй. Гоф сохдеигьо евош бире бэгъдо, сернуьш колхоз гоф вегирде, мугу:

—Хьовиргьо, иму одомигьой советиним. Иму имбуруз Нисиме э колхоз невегирдимге, гIэилгьо эз дес миравт. ГIэилгьо чуь тэхсиркори эри бебегьо сохде коргьо. Эз елойге вегирде виниримге Мигьир, бебей Нисимигьо, у ишму гуитгьо зиёдие гIошириш небири, миёнее одоми бири. Ме э жогьилигьо э богъгьой эну кор сохдем, у э фэхьле гуж несохди. Дузи, богъгьо-хунегьоре эз дес ишу вегирденге, Нисим не бебешу екем шулухигьо сохдет, уш э гофгьой эн е парагьо гуьре. Оммо изму иму эдее диреним Нисим варасири у дуз небу гуфдире ве данусдени чуь хуби ве чуь зобуниге...

Эз гуьрдлеме оморенге, Ёвдо мугу эз Сенем:

—Дара эз гьомбор е гирфинке шороб дировун, Мирвориреш огол зе екем хурим эз шори эни кор. Э сес энугьо эз доруни хуне ведироморуьт Содугъ не Шевеньё.

—Туь чуь сохде инжо?—мугу Нисим эз Содугъ.

—Эдей нубогьо хунде,—мугу Ёвдо,—э Шевеньёревоз.

—Беге Шевеньёш э нубохунде рафдени?

—НэгI, э школе.

—Содугъ экин раби хундеки...

—Содугъ, гьери биёр е-дуь гоф хун эзу туройтуь,—мугу Ёвдо.

—Ме туро хунде нисе данусденуьм, лелей Ёвдо,—мугу Содугъ, терсе-терс э лой бебешу денишире,—воисдениге книг хунум.

—Дие ме рабире пул эйчуь доренуьм эзи хьол-рузме бурра,—мугу Нисим екем хуьршлемиш бире.

—Рабире пул кеми гуфдире,—мугу Ёвдо.—Э гIэил гоф месох. Туьре вою гуфдире, гьеймогьой девр гIэиле э нубохунде нореи? Руз-беруз экин раби эри нубохунде рафдегоре гIэилгьо эдете кем биренуьт. ГIэиле э школе норе гереки.